近期香港各區有多個樓盤推出，驟看銷情認真麻麻。不過比起《施政報告》宣布減辣之前，成交已經算係咁。據非正式統計，過去兩日（4日至5日），全港一手樓市場總共錄得104宗成交，已經創下近10個周末新高。諗番起樓市好景的時候，賣得嗰百零個單位真係濕濕碎。
未來呢一兩個月，應該仲有不少樓盤推出，尤其是由幾個發展商一齊合作的樓盤，各有盤算，夠鐘就要開售，好難話推遲。反而獨力或由一、兩家發展商合作發展的樓盤較容易話為。根據差餉物業估價署最新數據推算，今年9月全港私人住宅落成量約2,309伙，創下今年2月錄得3,115伙以來的7個月新高，較8月僅97伙竣工，按月暴增22.8倍。而截至9月底，今年累計有10,090個私人住宅單位落成，與截至8月底的7,781伙比較，9月單月有約2,309伙落成，係2月以來，單月落成量再度突破1,000伙大關。
講真，而家啲樓確係抵買，發展商開價都唔敢太進取。筆者認為，中東戰爭已經令到美國煩到癲，加上有消息話美國加息潮將逐漸減退，明年美國又要舉行總統大選，或會為中美兩國元首在APEC的高峰會帶來融洽氣氛，春江水暖鴨先知，對香港的樓股都起到提振作用。美國聯儲局上星期公布議息結果之後，美國10年期債息連跌三日，本週一在亞洲時段稍為反彈，但投資者預期美國加息終結，明年下半年開始減息，對樓股都係一個良好訊號。
由於超賣原因，筆者就睇好汽車股，以及電商科技股。汽車股可買頭嗰五隻，尤其係電動車生產商。中國電動車近年銷量持續上升，已經為歐美車廠帶來好大壓力。加上華為這兩天將宣布推出品牌第一輛電動車，相信中國的電動車市場將會十分具競爭性。
=============
延伸閱讀：【吳老闆筆記】國產電動車後勁凌厲 Tesla料三年內跌出三甲
=============
深入閱讀政經生活文化，更多內容盡在：
Website：www.capital-hk.com
Facebook：www.facebook.com/CapitalPlatformHK
Instagram：www.instagram.com/capital.ceo.entrepreneur
LinkedIn：www.linkedin.com/company/capitalhk/