特首李家超任內第二份施政報告講咗超過三粒鐘，從初生嬰兒到老有所養都全面提到，難怪佢破天荒選擇坐喺度宣讀。值得一讚係特首終於為振興樓市推出一系列措施，估計對穩定樓價有一定作用。
好似落實「資本投資者入境計劃」咁，將合資格投資者的投資門檻提高到3,000萬，本應係好貼地的事。講真，嚟得香港的移民人士根本唔會志在嗰3,000萬，但略嫌美中不足係這些投資者只可以投資股票、基金、債券等資產，但就唔可以投資房地產，這對振興本地樓市無疑係少咗一個好大的推動力。既然決定移民，好自然要考慮居住問題，而家唔畀嗰筆錢投資喺房地產上，會令有意移民的人士少咗一個選擇。當然政府要同樣正視資金外流問題，要諗計點樣吸引同留住外來資金。
對於政府決定對樓市有限度減辣確係抵讚，現在的樓市同過去已經唔同晒，人口不斷減少，經濟又不復從前，以前為遏抑樓價而推出的辣招已經不合時宜。今次政府將辣招減半，相信對樓市有鼓舞作用。尤其額外印花稅禁售期由3年縮短至2年，有助增加二手供應。至於將外地買家辣稅由30%減至15%，合資格專才來港置業的辣稅改為「先免後徵」；新住宅印花稅亦減半至7.5%。相信可以釋放更多潛在的置業剛需，應該有助樓價止跌回穩。
住屋同人口息息相關，今次施政報告對人口政策落墨甚多，但要將本地人口谷大到1,000萬係咪有效呢？真係要拭目以待。當然，對新生嬰兒發放20,000元獎勵、提供稅務優惠，以至抽居屋或公屋有優先安排，的確會刺激到時下需要申請公屋或想購置居屋的年青父母考慮生育問題。更加抵讚的是，政府唔係停留喺基本步，而係幫大家諗埋在職家庭的育兒問題，例如增加在職家庭津貼，以及增加幼兒中心名額和津貼等，即係生育子女後，提供埋今後的育兒服務，令父母無後顧之憂。至於基建、教育等，份施政報告都好有point，容後再講。
總體而言，特首呢份施政報告要畀分的話，我就畀90分以上。依家全球經濟環境惡劣，港人除咗自求多福，仲要少啲同政府抝撬，咁先至可以和氣生財，共同捱過呢個難關。
=============
=============
深入閱讀政經生活文化，更多內容盡在：
Website：www.capital-hk.com
Facebook：www.facebook.com/CapitalPlatformHK
Instagram：www.instagram.com/capitalplatform.hk/
LinkedIn：www.linkedin.com/company/capitalhk/