以前，啲女朋友成日問，「你阿媽同我跌落水，你救邊個?」，相信呢個世紀難題，兩個只能活一個，一直考起唔少男士……

世代唔同咗，而家竟然係，為樓死，為樓亡?!!阿媽同層樓之間，有仔仔竟然選擇要層樓，都唔要阿媽?!!!!

網上流傳一輯圖片，疑似有仔仔要求阿媽賣樓分身家，更獅子開大口，要求分300萬元！點知，懷疑索價不果，就將全屋家具推倒，令家中慘變成「廢墟」，同阿媽一拍兩散！

從照片可見，該單位由客廳到睡房，均被人搗亂，雜物散落一地，十足十打完仗咁款，就連電視機同枱燈都無一倖免，通通被人推晒落地。

仔仔仲係牆身寫大字：「To 老媽，我想你應該還不是很明白。我不是在外住到6月份。我係要分一半房屋的價錢，『3百萬』。之後過我自己的生活，我不會回來的了。」又說：「我要嘅係尊重，對自由、尊嚴、平等嘅待遇。」更在房門外，大大隻字寫上「賣樓」！