香港

上車客撻著換樓搶盤潮!!　淘大花園上車客兩次遭遇「程咬金」終搶贏2房筍盤　再推薦業主同屋苑換樓住大70呎　新香港人一獲永居即「撲水」入市!!　
2021-04-17

上車客持續追入市，同時「撻著」換樓鏈，主打細價樓的老牌二手上車屋苑特別受市場追捧！「九龍灣三寶」之一的淘大花園最近交投暢旺，4月截至17日已錄得至少9宗成交，佔3月全月15宗的六成。其中有上車客之前「唔夠人爭」，錯過屋苑平台特色放盤，之後雖然睇過同屋苑其他大單位，惟苦於「銀彈」不足買唔起；幸好最終物色到另一391方呎細2房上車盤，即時上門跟業主講價，惟議價中途竟半路殺出個「程咬金」，有另一買家到場拍門想睇樓講價！不過今次上車客企硬，係業主屋企「賴死唔走」拉鋸，最終誠意打動，更獲業主減價12萬元、以638萬元易手！而上車客接貨後亦「禮尚往來」，得悉業主想換樓後，即時推薦之前睇過的同屋苑池景大2房單位；而原業主睇過該460方呎的「推薦盤」後亦深感滿意，賣樓後幾日即斥763萬元入市換樓，補多125萬元住大70呎！ 另外，有年輕夫婦由內地來港已夠7年，一成為「永久居民」後，即時向家人借錢「撲水」，斥629萬元拍板購入淘大花園2房戶上車，由「租客」榮升「業主」！ 上車客兩遇程咬金終搶贏淘大花園2房 利嘉閣地產高級聯席董事鮑允中表示，淘大花園交投持續暢旺，4月截至17日已錄得至少9宗成交，佔3月全月15宗的六成。該行新近促成淘大花園I座中層6室成交，單位實用面積391方呎，2房間隔，以638萬元沽出，呎價16,317元。據悉，買家為同區上車客，原先大約兩星期前打算購買淘大花園R座一個平台特色單位，不過當買家「送訂」時，突然半路殺出「程咬金」，另一買家開出更高價錢搶盤；惟上車客不肯追價，最終落敗買唔到。其後上車客再物色其他淘大花園放盤，雖然睇過幾間大2房放盤，惟買家因資金不足故未能入市。幸好上車客最終物色到同屋苑的391方呎I座中層6室，更即時上門跟業主講價，但議價中途竟然又來多個「程咬金」，再有另一買家到場拍門想睇樓講價！不過今次上車客企硬，一於在業主家裡「賴死唔走」，買賣三方拉鋸一輪，上車客最終誠意打動，獲業主減價12萬元、以638萬元承接單位自用！ 業主賣樓幾日即購同屋苑住大70呎 上車客接貨後亦「禮尚往來」，得悉I座中層6室原業主想換樓後，即時推薦之前睇過的同屋苑Q座高層2室，單位實用面積460方呎，大2房間隔，享開揚池景。而原業主睇過上述池景「推薦盤」後亦深感滿意，賣樓後幾日即斥763萬元購入該單位換樓，呎價16,587元，補多125萬元住大70呎！ 淘大花園2房戶零議價沽 鮑允中續透露，該行日前再促成淘大花園N座低層2室成交，單位實用面積377方呎，2房間隔，望商場內街景。原業主最終以629萬元「零議價」成功沽出單位，呎價16,684元。據悉，原業主於1985年5月，以26.945萬元購入上址，持貨36年，現轉手帳面獲利602.055萬元，物業升值達22倍。 「新香港人」夫婦一獲永居即「撲水」入市 鮑允中補充，上述單位買家為一對年輕夫婦，自7年前由內地來港攻讀碩士，畢業後兩夫妻一直在香港租樓，適逢最近申請到永久居民身分證成為「新香港人」，所以決定買樓上車。兩夫婦早於3月尾時已出票600萬元想購入此淘大花園N座低層2室放盤，惟當時因與業主叫價相差29萬元，資金不足因而作罷。幾日前兩夫婦因成功向家人借到錢，故再次出價620萬元購買該單位。因業主見買家盛意拳拳，雖然最終仍以「零議價」629萬元成交，但留下部分電器、家私給買家，幫助年輕人上車。 淘大花園現有約131個單位放售，叫價由479至830萬元不等。 [...]

香港

買棵菜都揀，買樓唔使睇??　樓價指數CCL再創新高　二手市場爆「無睇樓」搶盤潮!!
2021-04-10

香港人十元八塊買斤菜都驗屍咁驗，反而一千幾百萬買樓就睇都唔使睇！事緣二手市場業主見樓市企穩，叫價亦開始愈來愈硬，甚至有業主反價，買家見筍盤愈來愈少，索性睇都唔睇就「搶」咗先算！例如最近有換樓客斥近「6球」，在「無樓睇」的情況下仍拍板買入粉嶺花都廣場頂層兩房連天台戶，單位造價更創屋苑兩房戶新高。另外元朗譽88一個三房套單位雖然有租客不設睇樓，但由於業主肯大劈價「1球」放售，故仍吸引買家無睇樓接貨。而最近「打得火熱」、單單3月份就錄得535宗二手成交的將軍澳，於4月份再接再厲，僅僅一星期已再獲過百宗成交，當中更有首置客願意無睇樓兼零議價，斥1,350萬元連租約購入一個Savannah三房套單位。而屯門更有上車客「只睇相不睇樓」，即斥580萬元購入新屯門中心兩房單位。事實上，本港樓價再被搶高，反映二手私宅售價的中原城市領先指數CCL最新報181.31點，創36周新高，按周升0.54%。其中港島樓價按周升2.07%，新界東樓價則按周升0.44%。 粉嶺花都廣場兩房連天台獲換樓客無樓睇承接　造價598萬創新高 樓市氣氛熾熱，換樓客在「無樓睇」的情況下仍決定拍板，更為粉嶺花都廣場造價創出新高。世紀21奇豐區域經理陳偉康表示，該行新近促成粉嶺花都廣場成交，單位為4座頂層連天台戶，實用面積413平方呎，2房間隔。單位原開價600萬元，放盤僅4日，據知單位「無樓睇」，其後獲同區換樓客以598萬元承接，減幅3%，實用面積呎價14,479元，屬該屋苑兩房戶造價新高。 據了解，原業主於2001年4月購入上址，當時作價130萬元，持貨20年至今轉售，帳面獲利468萬元，物業升值3.6倍。 元朗譽88三房套劈價一球　無樓睇850萬沽 利嘉閣地產高級經理朱子華透露，該行新近促成元朗譽88 二座高層B室的二手成交，單位實用面積663方呎，建築面積871方呎，採三房套間隔，望開揚市景。單位由2016年8月開始放盤，原叫價950萬元，由於有租客不設睇樓，最終減價100萬元或約10.5%，至近日獲買家以850萬元承接，並以交吉形式沽出，實用面積呎價12,821元，建築面積呎價9,759元。據悉，原業主於2013年2月，以660.3萬元購入上述單位，持貨約8年，現轉手帳面獲利189.7萬元，物業升值29%。 朱子華補充，譽88本月至今累錄至少3宗二手成交個案，平均成交實用呎價13,395元，屋苑現時有約28個單位放售，叫價由680萬元起。 將軍澳3月錄535宗二手成交　首置客無睇樓零議價購Savannah 繼今年1月份錄得431宗二手成交、2月份錄得358宗成交後，將軍澳二手交投再創「癲峰」，3月份突破「500大關」、共錄535宗二手買賣，按月暴增近5成！本月將軍澳再接再厲，４月開首僅一星期，已錄至少103宗二手買賣，其中更不乏無睇樓搶入市個案。香港置業市務經理 (銷售) 莊家豪表示，新盤熱帶動下，二手成交亦不俗，該行剛促成一宗Savannah 3房買賣成交，有區內首置客以1,350萬元入市，實用呎價20,548元，屬市價成交。 售出單位為將軍澳Savannah 3B座高層A室，向東望內園及山景，3房套間隔，實用面積657平方呎。莊家豪稱，單位以1,350萬元放盤即獲區內客接洽，業主不設議價空間，最終以原價1,350萬元連租約成交，實用呎價20,548元。據了解，新業主為首置客，鍾情單位景觀開揚及屋苑可飼養寵物，在沒有睇樓之下決定入市。 [...]