David Webb半年前狙擊「謎網50」街知巷聞，平時唔睇股票嘅人都有聽過「細價股災」、「粉塵爆炸」、「康宏廉署風暴」、「證監會打邪惡集團」等熱爆財經關鍵詞。由股價集體暴跌、停牌到連環DQ，半年來David Webb掀起嘅風波仲好睇過大時代，有媒體更為David Webb冠上「股俠」之名。

不過David Webb近呢一年又有咩愛股呢？查看港交所嘅權益披露，發現到股俠原來偏好二三線、市值細嘅「舊經濟股」，通常以製造及銷售日用品為主，尤其對晌東莞設廠嘅廠商情有獨鍾。

呢啲股票亦有兩大特色，一係資產淨值（NAV）有折讓，一係股息收益率吸引，甚至係兩者俱備。

至於股價表現係點？我地不妨睇吓四隻David Webb持倉甚重嘅個股。

1. 新興光學（0125.HK）

主要業務：設計、製造及銷售眼鏡產品。
市值：8.4億
現價：3.2元
資產淨值：3.548
市賬率：0.902
市盈率：11.034
股息收益率：7.81%
廠房地點：東莞、紫金

短評：股價十年重返家鄉價，用嚟收息好好

分析：David Webb於今年7月14日以均價 3.06元加注60000股新興光學。現時持股量為2632.8萬股，佔總股本10.01%，市值8424.9萬，係股俠持倉甚重嘅愛股。而且，股俠已經持有咗呢隻股份十年！查年報，股俠自2007年3月31起已持有1315萬股，佔公司股份5%，而且近乎每年加注，到而家已經加左一倍。

到底呢隻股份有咩特別呢？查看近十年嘅股價走勢，原來只係重返家鄉！07年3月新興光學嘅股價係3.2元，到今日依然係3.2元，股價雖然在08年歷重創並急速回升，但之後走勢異常平穩，長達三四年在窄幅區間徘徊不在話下。新興光學近幾年嘅盈利增長亦唔算特別吸引，反反覆覆，冇咩驚喜。

不過呢隻股票派息十分穩定，每年派兩次息，仲有特別息。股息收益率高達 7.81% 。所以話David Webb係一個價值投資者，鍾意長期持有收息股！而且睇資產淨值，對股價有0.348元嘅折讓，市帳率為0.9，即係每九毫子就買到值一蚊資產，依然十分「抵買」。

2. 利民實業（0229.HK）

主要業務：製造及銷售家用電器，如空氣淨化機、男士鬚刨等
市值：5.34億
現價：1.07元
資產淨值：1.192
市賬率：0.898
市盈率：11.239
股息收益率：7.48%
廠房地點：南沙

短評：股價七年不變，一樣收息股

分析：David Webb於今年8月30日以均價1.08元加注150000股利民實業。現時持股量為2917.3萬股，佔總股本6%，市值3121.5萬。相較新興光學，股俠近期（2015年）先至做利民實業嘅大股東。

呢隻股票各方面都同新興光學極之相近，風格十分一致：市值細、資產淨值有折讓、市盈率低、股息收益率高。以致股價走勢，都係極之平穩！股價雖然自03年至06年炒上2.5元水平，但自2010年回穩1元水平後，七年來變化極小。相信股俠睇中嘅依然係佢嘅穩定派息能力。但股價走勢就有些少令人失望！

3. 精熙國際（2788）

主要業務：製造及銷售光電產品之塑膠及金屬零部件等
市值：11.08億
現價：1.34元
資產淨值：1.122
市賬率：1.194
市盈率：26.901
股息收益率：12.69%
廠房地點：東莞

短評：股價終於有驚喜

分析：David Webb於今年8月8日以均價1.5967元加注129萬股精熙國際。現時持股量為7611.2萬股，佔總股本6.91%，市值7611.2萬。股俠最早晌2014年成為精熙國際嘅大股東，當時已持有5020萬股，佔總股本6.06%。

呢隻股票嘅股價終於有啲驚喜！2014年12月時股價為0.87，現時為1.34元，升了57%，不過呢個升幅用咗3年。呢隻比較會升嘅股票無左兩個webb選股特徵，包括NAV冇折讓，PE亦偏高。但仍然符合股俠風格嘅，就係強勁嘅股息收益率，達12.69%！而且，呢間公司廠房亦設喺東莞，睇嚟股俠對此情有獨鍾。

4. 同得仕（0518）

主要業務：製造及銷售時尚服裝
市值：4.5億
現價：0.96元
資產淨值：1.019
市賬率：0.942
市盈率：N/A
股息收益率：N/A
廠房地點：東莞、越南、杭州、深圳、中山

短評：除了東莞設廠之外，想不到股俠的買入理由

分析：David Webb於今年11月24日，即係不久之前，以均價0.8044元加注402.8萬股同得仕。現時持股量為2242.17萬股，佔總股本5.03%，市值2242.17萬。呢隻股票David Webb 近期先至大幅建倉，查過往年報並無相關持倉。

上述四隻股份入面，呢隻最為特別。特別在於兩年都無息派！而且公司過往五年有四年都虧損（包括近兩年），2017年蝕1.19億，2016年蝕6545萬。惟一仍然符合股俠風格嘅係資產淨值有折讓！ Webb的買入價是0.8044元，即係每0.78元，就可以買到值1蚊嘅資產。除此之外，按過往風格，我仲未諗得明點解股俠會睇中呢隻股票，唔通係因為呢隻股票亦有晌東莞設廠？

撰文：阿發