博客

【港股專家】巨鯨：細價股領域　高手較量之地　環球信貸(1669)具實力

報紙新聞話，美國加息加得咁開心，阿根廷都唔執輸喎，狠加息至60厘，誓要爬過美國火車頭，成為高息貨幣，咁先至叫型仔。財仔最多都係收60厘回報，計埋燈油火蠟？回報當然少過60厘啦！我地拎錢去阿根廷定期仲發過做財務公司呀！ 條數係咪咁計先？睇多兩眼！喂，原來阿根廷叫緊救命，需要江湖救急。實情我都有惻隱之心，好想去幫下手。但係……你知啦……長貧難顧家嘛，幫手都要睇情況架。一陣間俾佢拉埋落水，浸親我仲得掂嘅！ 觀察下基本數據都要嘅，平時我地借錢俾朋友都要睇佢還唔還到錢家嘛，唔係送俾佢家嘛。望一望個披索對美金匯價，真係 OH MY GOD！嚇到寶寶都大叫。貨幣貶值嘅速度，仲快過杯雪糕溶嘅速度，咁點買啫。2014年至今阿根廷披索貶值咗四倍，60厘都死啦，買堆廢紙番黎貼牆紙呀！第日我拎箱銀紙，去買包紙巾，不如我直接用銀紙抹嘴喇，起碼可以抹多幾百次。 缺乏美金支持匯價 點解政府要咁樣玩法呢？好好地好似香港嘅港元同美金掛鈎唔好咩！要有穩定嘅匯價，先至會有商家係當地投資家嘛。鬼唔唔知呀媽係女人咩？小朋友細細個都被教育要尊敬父母架啦。有幾多人做得到先得架，紙上談兵係人都識啦！而家問題係，阿根廷無美金頂住個匯價呀嘛。匯價咁走法，啲商家又話撈唔掂，要換番美金走人，巿民又話要唱美金去旅行(當地居民邊有錢去旅行啫)。個個都要美金，你估美金印出嚟架？你又估中呀，美金真係印出嚟，只不過唔係阿根廷印得到之嘛，美國先可以印美金。 大佬呀，美國印到美金，叫美國幫下手咪得咯，大家樓上樓下，唔係唔幫手呀？呢鑊野巨鯨可以答下嘴啦！美國幫阿根廷就出奇蛋囉。整個量化寬鬆嘅部署，就係等呢一日。美國火車頭係08年個車轆卡住咗，唔識郁就係人都知架啦，美國做唔到最強嘅貨幣咁點算？美國唔洗最強嘅，你地破哂產投降就得架啦！ 量化寬鬆咪就係美國近十年嘅新武器囉，平息借美金俾大機構將錢存放係不同嘅高息貨幣做套利，再經過銀行體系嘅工序，當然借哂出去啦。問題就嚟啦，而家美國加息，比著你會點做？緊係攞番啲外幣，兌番做美金，班師回朝還番俾美國啦!面對排山倒海嘅兌換，銀包無哂美金，就出事囉。 咁阿根廷個情境咁嚴峻，仲有冇得救？巨鯨真心果句，如果輕輕擦傷流血就有得救，搵人貼塊膠布就搞掂。而家係美國大佬要搵佢做炮灰嘛，打擊全球投資者信心，令全球資金回流美國，令到弱國貨幣骨牌式崩盤，阿根廷係適當人選，命中注定成為第一張骨牌。阿根廷叫救命係一早可預期得到，懶債次數榜上有名，但國際貨幣基金組織唔單只坐視不理，阿根廷叫救命都仲話要考慮下。考慮下這個答案真係可圈可點，作為一個聰明嘅投資者，司馬昭之心，路人皆知。 高手較量 講番股票，點解會拎財仔嚟講，因為巨鯨一直都留意財務上巿公司，當然唔會太大隻。我估會有朋友會問，乜而家細價股仲有得炒？首先要講番清楚，監管機構係嚴打殼股及財技股，而唔係細價股，所以做實業嘅細價股是可以。順便回答埋讀者嘅下一條問題，何解一定係細價股，因為細價股領域才係高手較量嘅地方。 如果你都是高手，可以一齊研究下環球信貸(01669)。一來，我個人認為這間公司業績不錯，二來，行家同我講，這間財務公司單單都是做大單，唔做散客，是一間有實力的公司。實業股每年都賺錢係基本，派息都是必須的，可能大家會覺得我要求好似有點高，但我們做投資，就是要尋找一隻好馬，又要馬兒好，又要馬兒不吃草。實際上，我要求不是太高，因為近兩年派息都有減少。為何我會睇中佢呢？除了股價殘之外，就是股價太殘。整間公司巿值3.3億港元，巿盈率5.25倍，派息率約5.9%，2014年上巿價1.35港元，而在報0.83港元，低招股價約40%，喺邊度搵？ 不過平還平，睇番四週嘅環境，戰火綿綿，七國咁亂，而家美國又話貿易唔公平，如果世界貿易組織處事對美國不公平，將會退出世貿。跟住嚟緊美國又話要發動史上最大型的軍演，動作多多。想個巿場氣氛都難，大家有眼睇，金管局接港元接都接到手軟，期望個巿會上升，除非美國換總統啦！另外8月28日剛剛公布業績，純利約2,821萬，增長13.5%，淨息差微增至12.3%，環球信貸可先放入觀察名單。等待大巿企穩才考慮。上望空間不多，預期股價不會大幅波動，純粹以收息股看待。 巨鯨（鄭希納） 主修金融系，股齡十五年，精通會計，配合基本分析，穩中求勝，成功避開兩次大型股災，在股壇上連翻獲利。創立《求知投資》投資教育平台，分享投資心德得，並為「投資好輕鬆」暢銷書作者。 [...]