永懷Lo Sir

【永懷Lo Sir】區展程

盧瑞盛兄，行內人喜稱阿盧，同事專稱盧sir。我多稱呼佢盧Sir，佢多叫我阿嬌。 我倆相識於1994年，因共事於亞洲電視，1997年因合作節目「回歸話香江」系列而相熟，相交至今。 工作上，盧Sir認真、堅持、爽快，從不拖泥帶水，唔會半途而廢。1997年盧Sir話「回歸話香江」有一集要拍攝賭船，唔記得點解會由我去搵場地俾佢哋拍，最終我安排咗隻賭船俾佢哋，由於賭場要出到公海先開，拍攝時間非常緊迫，令我體會到盧Sir工作時的快狠準。2012年，盧Sir引薦我加入RoadShow，「香港走出去」發佈會係我首個負責的項目，令我體會到盧Sir的堅持，因為佢嘅堅持，我哋鍥而不捨搵晒成個香港，目的只為搵一支全港最光最亮的雷射筆，從他身上學懂「做咗件事」與「做好件事」嘅分別。 盧sir熱情，好客，有佢的地方就有好嘢食，佢唔只識食，仲識煮，廚藝極好，相信好多佢嘅朋友嘗過都有同感。佢以前經常招呼朋友同事上盧宅開餐，農曆新年一齊「撈起」，係我哋同事過新年的指定節目。 盧Sir一向都注運動，所以體型保持得很好很健康，據佢講每朝都往跑馬地馬場做運動，近年更戒了煙，酒亦淺嘗，非常養生。有次佢同我講開減肥修身，佢話想知一個人減肥成唔成功好容易，如果未開始就去買套靚衫靚波鞋，嗰個人一定唔會成功，因為減肥修身係要做運動，而做運動只須要恆心就得，不過恆心係冇得買嘅。 盧sir樂於提攜後輩，我都係受過佢恩惠嘅人，多謝盧瑞盛先生。 相交26年，對於你不辭而别，感到非常難過。 願你安息。 晚輩 區展程 (撰文:區展程 前亞洲電視公關及宣傳助理總監) [...]