博客

Vikey Chen：「移民潮」持續 | 父母不惜揼本幫仔女學英文
2021-12-20

我嘅一位香港朋友準備做媽咪，上個月用六萬蚊買咗一套英文教材。 我笑佢：「BB仲喺肚裏面喎！」點知朋友輕描淡寫道：「唔早㗎啦，好多人用埋嚟胎教，仲直接買多元智能套裝。可惜我唔夠budget，唯有買住基本版先。」 六萬蚊，絶對唔係一個小數目。喺父母眼中，呢種「非常」早已成為「正常」。借用朋友嘅話：「呢啲錢唔慳得，將來如果移民，唔識英文就頭痕。」根據中大香港亞太研究所最近發佈嘅資料，42%受訪港人打算移民。大勢所趨，我嘅朋友亦難抵洪流。 好多父母都想仔女英文嘞嘞聲，用咗好多時間、精力、當然仲有金錢，都成效甚微。到底點先可以事半功倍，將學英文變成一件自然好玩嘅事？ 「一人一語」（one person, one language）最有效 我嘅美國朋友Giancarlo Di Mizio，佢嘅一對仔女精通三種語言：英文、意大利文、西班牙文。從事語言教育及研究十幾年，就職Indy Language Center教育總監，佢認為要培養多語言兒童，最有效嘅方法係「一人一語」（one person, one language），而昂貴教材只係其次。 「一人一語」係指，與小朋友日常接觸嘅人，只講各自擅長嘅一種語言。對Giancarlo嘅仔女而言，媽媽講英文、爸爸講意大利文、保姆講西班牙文。有啲父母擔心，呢個做法會造成語言混淆，最後搞到兩頭唔到岸。 Giancarlo認為，只要大人貫徹始終，堅持只講一種語言，小朋友會學識根據談話對象轉換語言。多語言環境中成長嘅小朋友，都可以「自動轉台」輕鬆無難度。 切忌唔鹹唔淡「中英夾雜」 「一人一語」係個好方法，不過並非所有父母都擅長英文。Giancarlo話，如果你英文半桶水，不妨搵他人代勞，千其唔好中英夾雜。例如「呢個apple好red」，喺同一句話裏面不斷「轉台」，只會搞到仔女頭都暈。打亂語言學習，阻礙佢對不同語言嘅判斷。 我有位香港朋友，佢嘅工人姐姐無論煮飯定做家務，都完全無天分。但係朋友好滿意，而且續約再續約。我不解，朋友一語道破：「呢個姐姐英文好得，阿女英文咁好全靠佢。」 語言源於生活，朋友明白呢個道理。自知英文麻麻嘅佢，選擇搵外援，將英文融入阿女嘅生活。呢位工人姐姐洗杉煮飯唔在行，佢嘅selling point係一口高水準嘅英文。朋友如獲至寶，各取所需。 如果你英文好好，家中又有菲傭，不妨沿用「一人一語」原則，俾仔女學埋菲律賓文。我嘅一位朋友，當年屋企菲傭識英文，但係父母要求菲傭只講菲律賓文（Tagalog）。久而久之，朋友對菲律賓文就駕輕就熟。佢話：「啲親戚仲笑我阿爸阿媽，唔明仲咩學啲偏門嘢。」 40年後嘅今日，朋友佩服佢父母嘅遠見。佢碩士畢業後，加入一間行內數一數二嘅VC創投公司。因為識菲律賓文，公司安排佢飛過去半年，實地考察並研究菲律賓農業投資市場。呢個經歷，成為佢喺創投界大掌拳腳嘅踏腳石，至今平步青雲。 善用「情感策略」同「感官刺激」開心學英文 Giancarlo 係YouTube「香港Vikey移民美國」一連4集講「學英文嘅各種竅門」（https://youtu.be/PvStMCCE4ko），佢覺得語言學習講求方法：「與其用六萬蚊買教材，不如攞去同一班講英文嘅朋友吃喝玩樂！」佢好認真咁講：「社交實際上係運用情感策略，融合感官刺激。既輕鬆自然，又事半功倍。」 當你心情好，係咪一切都充滿希望，甚至覺得無所不能？Giancarlo話，積極嘅情緒會將你嘅學習潛能發揮到極致。而吃喝玩樂帶來嘅感官刺激，有助記憶新語言。佢仲話，腦神經嘅發展將持續一生，大腦充滿可塑性。新嘅生活體驗及人際交往，都會幫助腦神經形成新迴路。 所以，當你同講英文嘅朋友，一齊做有趣嘅事，進行大量有背景有意義嘅對話，大腦會將英文內化。加以時日，你自然可以直接用英文思考同表達。 我嘅一位朋友鍾情法國文化，因為喺大學工作，幾年來識到不少法國交流生。疫情前，佢一家人幾乎每個週末，都帶啲法國學生捐窿捐罅周遊香港。5歲嘅阿仔雖然無上過法文班，但已經可以同法國友人溝通無阻。朋友嘅無心插柳，正係「吃喝玩樂」情感學習法嘅完美詮釋。 掌握竅門，萬變不離其宗 不過，如果識唔到外國朋友，可以點幫仔女學英文？ Giancarlo話，如果父母已經買咗教材，其實都可以好好利用。例如，父母不妨引導仔女，將鐘意嘅英文故事改編。呢個再創作嘅過程，可以刺激好奇心同創意，比單純記憶故事內容更有效。或者，選取教材中好聽嘅英文歌，同仔女一齊加入舞蹈元素。邊唱邊跳，開心之餘又刺激感官。 你就算唔買教材，網絡都有好多免費資源。只要你明白「積極情緒」同「感官刺激」嘅重要，就可以自創適合仔女嘅方法。掌握竅門，萬變不離其宗。 如今「移民潮」持續，父母不惜揼本幫仔女學英文。如果唔想洗冤枉錢，就切勿心急亂投醫。無論你想仔女搵份好工，定係計劃移民，抑或想下一代睇得明「美國獨立宣言」嘅天賦人權同自由平等，學英文都要記得理性消費。 ****************************************** 撰文 ：陳曉瑋 Vikey Chen「香港Vikey移民美國」版主   [...]

博客

移民美國港媽Vikey Chen：移民唔應該只為仔女
2021-01-17

今時今日嘅香港地，正上演「亂世移民潮」，茶餘飯後嘅話題都係移民。機場嘅一幕幕灑淚揮別，好煽情，但實在不必要。畢竟網絡發達，親情友情能否維繫，早已同距離遠近無關。最近，我有好多朋友正考慮離開香港，移民歐洲、美加、澳洲、台灣都有。我問佢哋點解想移民，十有八九都話「為咗下一代」。每當聽到呢個理由，我都會奉勸佢哋，三思而後行。只為仔女而移民，係好危險嘅諗法，註定之後嘅每一步棋，都會舉步維艱。 父母應將自己放首位 就好似最近有讀者，喺我Facebook專頁留言，話為仔女教育，正考慮移民。我覆佢，其實任何地方，只要父母企得硬，都可以make a big difference。跟住佢反問，如果唔係為咗囡囡，我哋都唔使來美國啦。我再覆佢，話我哋來美國唔係為咗囡囡，以前喺香港，佢讀國際學校一樣好開心。雖然好多人離開香港，都話為下一代，但係我永遠將自己嘅需求放第一，而唔係仔女。 將自己放首位，真係好重要。當你考慮移民，應該先諗下，對自己嘅影響。離開香港對你有乜好處？新嘅環境你點去面對？大家成日擔心細路嘅適應問題，殊不知大人其實更難適應，因為unlearn好難亦好痛苦。 「為阿仔」移民險成噩夢 我有一個早年移民英國嘅朋友，佢當初決定移民，都係為阿仔。聽人講英國教育好過香港，到底點先為之好，佢其實都唔清楚。總之個個都話好，就一定好。無知要付出代價，呢次「為阿仔」嘅移民，幾乎成為噩夢。 話說阿仔喺英國嘅學校，背靠一片森林。老師會拉住一車教具，帶班細路去森林玩。爬樹抓蟲，上山下水。講緊嘅唔係每年一次嘅field trip，而係每個星期三次嘅森林課堂。阿仔梗係玩得開心，好鍾意返學。但係朋友就提心吊膽，驚阿仔跌親撞損。又怕玩得太多，會老大徒傷悲。而佢自己亦好懷念香港嘅多姿多彩。加上英國小鎮特別安靜，佢晚晚都靜到失眠，以淚洗面。於是，佢開始對阿仔發脾氣，開口埋口都話，阿媽移民都係為咗你。 我哋一班老友，日日WhatsApp開解佢。我亦提議佢睇下「Last Child in the [...]

專題

移民美國港媽Vikey Chen：移民壓力大，勿忘關注仔女心態
2020-12-30

BNO移民英國，將於1月底接受申請，成爲全城熱話。有人疊埋心水，早早教定鬧鐘，時間一到就遞交申請。有人舉棋不定，心大心細，怕一子錯滿盤皆落索。 無論如何，移民都係大決定。就好似有人住慣港島，他朝有日要搬去新界，竟視爲遠走他鄉，幾番掙扎。我真係坳晒頭，香港有幾大，港島搬新界都尚且如此，更何況移民。 不過，香港教育唔爭氣，披着「愉快學習」嘅羊皮，說穿了依然係一隻「痛苦學習」嘅狼，吃掉多少無憂嘅童年。經受過，就不忍心仔女再入狼口，於是不少父母另謀出路。有人選擇特色私校，有人鍾情國際學校，更有人把心一橫，舉家移民。 尋尋覓覓，逃離荒誕，但求有幸呼吸一口自由嘅空氣。 移民壓力大，充分溝通必不可少 好多決定移民嘅父母滿心歡喜，認爲擺脫分數至上嘅傳統香港教育，終於爲下一代搵到出路。然而，面對移民呢個大決定，往往忘記聽下仔女嘅睇法，忽略咗佢哋嘅感受。 有研究發現，搬屋嘅壓力大過離婚，榮升十大壓力來源之首。小小年紀，未必懂得處理步入新環境嘅壓力。所以，移民前同仔女有充分溝通，疏導佢哋嘅情緒，實在必不可少。 留學英倫前的準備 最近同人氣急升嘅「英國通」Goodbye HK Hello Billy傾計，佢即將結集成書嘅《一念英倫》系列，大家應該唔陌生。嬉笑怒罵道出多少香港人嘅心聲，才子陶傑亦頗爲賞識。我哋傾咗好多英國讀書嘅嘢，佢囡囡喺英國寄宿學校讀五年班。留學前，Billy真係做足功課。打算移民嘅父母不妨參考一下。 話說囡囡懂事起，Billy就時不時提及英國。囉嗦如唐僧，只爲令囡囡知道一家人嘅移民計劃。佢話，「想喺阿女嘅小腦袋，放一粒種子」。如佢所料，呢粒種子逐漸發芽，囡囡明白將來會喺英國生活，於是對英文好有興趣。自幼稚園起，就特別主動同外教交流，成爲外教至愛，英文自然越來越好。到囡囡大啲，一有機會就帶佢飛去英國，會會當地朋友，體驗平常生活。囡囡好快愛上英國嘅天高地闊，如願喺今年踏入10歲之際，負笈英倫。 憧憬移民後的新生活 社會心理學有個現象叫，self-fulfilling [...]