香港終於有自己嘅XXX項目喇！講緊嘅係「日本名」新盤項目呀~~ 話說而家嘅新盤改名愈來愈有「性格」，昨日（11月5日）恒基將自己位於尖沙咀德成街嘅住宅項目命名為「本木 Arbour」。咦？個名好東洋風喎！小編即刻問吓Google大神，呢個名有乜來頭。嘩，原來同日本知名男優「本木雅弘」撞姓，亦同島國暗黑女優「本木優美」同一祖宗喎！根據某動作電影封面介紹，本木小姐仲係空手道黑帶高手添！睇黎「本木」呢個名真係唔惹少。

不過，恒基物業代理營業（二）部總經理韓家輝就話，項目命名為「本木 Arbour」，靈感源自德成街一棵屹立嘅老樟樹，呢棵古樹見證項目一帶嘅變遷：「象徵在時間的沉澱下，經年熟成出恬靜氛圍和顯赫氣度。」哎呀，原來個名真係來自一碌木，仲有咁深邃嘅文化土壤架！韓家輝仲話，呢個名「注入東京人氣地帶「六本木」之時尚感。」哦，原來係「六本木」無咗個「六」字。

講咗咁耐，呢碌「本木」一共提供172個住宅單位，間隔涵蓋開放式至3房，當中2房及3房單位佔約27%，1房戶佔約56%，而開放式單位則佔約17%。項目地庫設有兩層停車場，預計關鍵日期為2021年4月30日。

另外，項目將於尖沙咀美麗華廣場開設示範單位，包括一個無改動示範單位，現時即將竣工，預計月內可開放予公眾參觀，碌「本木」最快今年11月內推售。