前主播方健儀離開大台後成為自由身，密密做密密食，加上出名精打細算，甚至連情人節都唔要收花，費事嘥錢，原來慳慳埋埋，已經變身低調富婆！最近佢肯豪花逾1,800萬元購入大圍站新盤柏傲莊3房單位，原來係因為30年前一份情意結~~

方富婆係自己臉書開Post自爆，話自己其實係沙田老街坊，30年前阿健儀妹升中，佢阿媽方太就想佢讀新田圍邨嘅循道衛理中學，但健儀妹就堅持要讀遠離屋企嘅沙田官立中學。雖然最終順利升學沙官，但健儀妹就要每日行半粒鐘上山落山，穿過徙置區、城門河，有時仲會去「青龍水上樂園」餐廳醫肚，仲幻想自己可以住係呢個樂園裡面，訓晏啲都唔會遲到。

少女情懷總是詩，轉眼30年，健儀妹已經成家立室，事業有成仲做埋富婆。而惜日嘅「青龍水上樂園」就變成新盤「柏傲莊」，方富婆亦終於可以實現30年前嘅少女夢，可以進駐「樂園」喇！雖然當年嘅「就近入學」奢望冇成真，但今日總算可以係返同一地方建立安樂窩，佢仲好期待每日開窗就見到母校添！

方健儀仲話，之所以揀柏傲莊係因為項目設計富莊園美感，有園林花海仲有日式梯田，尤其疫情冇得去旅行，都仲可以係屋企感受吓心曠神怡嘅環境~~