我的大佬盧瑞盛
已經記唔起幾時第一次見盧Sir，大概係十五六年前左右，係銅鑼灣一家樓上酒吧。當時我和一個老朋友飲酒，盧Sir和某位現任大學校長一起上來。他們兩個同我朋友係舊識，就介紹咗俾我認識。後來陸續碰到過很多次，每次都碰上幾杯寒暄一下，亦冇深交。到了2007年嘅某一天，個酒吧搬咗去銅鑼灣海旁嘅一間地鋪，我都經常係個度同朋友聚會。有一次我揸咗車，冇準備飲酒，叫了一杯梳打水，見到盧Sir都係度，打咗個招呼。後來忽然有一位大哥同佢親細佬推門入來，佢地同我及盧Sir都很熟，就邀請我一起過去。我馬上告咗個罪，離開酒吧，揸車返屋企，再坐的士返來。當晚盧Sir話好欣賞我，第一係尊重大哥，第二係有原則，開車返家再返來，覺得可以深交我呢個朋友。言談中盧Sir開始了解我工作同埋義務工作係做咩。傾下傾下，佢問我會否參選十大傑青。我話一直有興趣但好似好難，佢馬上約我跟住個幾日食午飯。
午飯食咗個幾鐘，跟住由杏花村沿著海旁一路行返去柴灣南華公司，再傾咗一個鐘。盧Sir教我應該點樣準備，同時也安排咗一個同事幫我做咗一個訪問。就咁，我地兩個開始經常見面，我亦都成功當選咗2008年香港十大傑出青年。跟住嘅日子，我同盧Sir差不多平均每一兩個星期都見幾次，有時係約埋一齊食飯，有時係係酒吧碰到。還有另外幾個朋友，最後成為了當時銅鑼灣出名嘅“粥粉麵飯”四大酒腳。，盧Sir係“粉”，我最細，係“飯”。有好幾年都係咁樣度過，友誼越來越深，我亦開始叫佢做“大佬”。事實上，大佬份人，愛憎分明，觀點尖銳，我地經常一齊討論時事，月旦江湖人物，我亦係佢身上學到好多嘢。日子一天天的過，大佬亦轉工去咗Roadshow， 跟住又返南華，但我地嘅友誼從未間斷，我亦因為大佬而認識咗Roadshow同南華嘅唔少朋友，到今天仲有合作。2012年，我同大佬一齊搞咗一個青年論壇，2014年又一齊參與咗一個慈善足球嘅籌備工作。近距離同佢共事，睇到佢做事嘅認真，亦認識到佢嘅豐富人脈資源同經驗，使我得益良多。
後來大家工作越來越忙，間酒吧亦都摺埋，我地見面嘅次數下降到幾個月先一次。但係每一次無論係約出來，定係外面撞到，大家都會好開心。大佬繼續會俾一啲建議同鼓勵我，繼續教我做人嘅道理。最後一次坐低傾計，係今年一月，一齊為一個傷殘人士慈善組織個活動主禮。大佬拉我埋一邊，話想南華入大灣區，做大灣區傳媒。我地約過咗農曆年坐低，結果因為疫情一拖再拖，最後竟成永訣。後來都有係公開場合碰到，但都冇機會真係傾。3月初限聚令前，我約咗幾個傳媒朋友食飯，其中一個主播話盧Sir係佢老師，我馬上Whatsapp佢邀請，但佢話約咗人，“下次，兄弟！”，呢個就成為佢send俾我嘅最後一個私人Whatsapp。之後有一兩次公事上個溝通，我亦都支持咗南華嘅“疫市大行動”，但就完全想唔到再也沒有機會同佢私聊。
我到今天都唔想相信呢個事實。大佬咁好嘅人，咁年輕又仲有咁多大計，點會話走就走。真係人生無常！憶起大佬，第一個印象係“真”。大佬係一個以真誠待人嘅人辦。眼裏揉不下沙子，佢知你需要幫手，就毫不猶豫兩脅插刀，佢覺得你錯，亦會不假辭色。我係佢身上學到好多嘢，亦深深地感覺到佢對我一直以來嘅愛護。今日，好多年輕人都開始叫我做“大佬”，但我常常好驕傲咁話俾去地聽，“盧Sir係我大佬”。我亦都學佢咁，盡量愛護同幫助年輕人，等佢地可以有所發揮。
別了大佬！我會永遠記住你對我嘅提點同幫助，亦會永遠以曾經有你呢個大佬而驕傲！來世再做兄弟！
(撰文: 洪為民 前海管理局香港事務首席聯絡官)