香港地有句諺語︰「地上執到寶，問天問地攞唔到」。不過，事實正是拾遺不報，隨時要坐監，而在飛機上見到「寶物」就更加要小心。最近日本廉航香草航空的機上，就正正有「金執」，更多達幾十公斤。
事緣上星期日（九日）一架從台北飛往日本關西機場的香草航空班機，空中服務員於機上廁所發現可疑布袋，一打開，居然有大量金條。布袋不止一袋，同班機另一個廁，同樣有一大袋黃金，兩袋合計有幾十公斤黃金。
警方估計為走私黃金，應該屬走私集團企圖從台灣帶入日本，但不知為何會棄在機上，亦好彩無其他乘客貪心，執走金條，否則之後一定一身蟻。好似之前有香港人貪心去免費旅行，以為只需幫人帶木刻製品過關泰國，點知原來是帶毒品，所以去旅行，萬事都以小心及不要貪心為上。
走私黃金到日本，原來可賺百分之八的消費稅價差，所以近年不時會有走私黃金案發生，今年四月就有十個自馬來西亞的旅客走私超過一百公斤黃金，市價逾五億日圓，今次兩袋黃金都應該值過億日圓。