香港建造業總工會於本週發表2017薪酬調整報告，指建造業工種平均加薪7.8%，不僅連續九年加薪，加薪幅度亦跑贏大市。
有見及此，《資本雜誌》編輯搜羅不同行業數據，比較發現，若建造業工人開工充足（市旺平均開工15至20日），月入竟追貼AO人工！此外，本文亦整理了各熱門行業的起薪點供讀者參考。
1. 駐院醫生：$59,445
個個狀元都讀醫，到底讀醫有幾好？
按政府數據，公立醫院駐院醫生起薪點為$59,445（公務員總薪級表第32點）， 頂薪為$109,670 （第44B點）。
而隨住人口老化，醫生職位持續緊張，需求龐大。醫管局年報推算，2021年公立醫院需要3.5萬多名醫生護士，2026年需求更擴至4萬名 ；而未來10年醫科同護士畢業生數量 遠遠未能滿足對醫務人員需求，即使2026年所有醫科生及護士畢業後加入醫管局，亦會出現800多個醫生及1300多個護士空缺。
需求如此大，僱主爭住請，唔怪得狀元個個都讀醫！
2. 政務主任（AO）：$49445
大學畢業生到底有幾多人想做AO？可能係所有。按公務員事務局數據，去年有1.9萬人應徵做AO（每年八大學位只有約1.5萬個），而AO位只有40個，即係平均475人爭1個位。點解咁搶手？AO起薪為$49,445（總薪級表第27點），頂薪為99,205（第44點），而政府較難受市場衝擊， 薪高糧準有保證。
但應徵者必須成功過五關斬六將先做到AO。考生唔只要通過CRE（公務員綜合招聘考試）同JRE（政務主任/ 行政主任聯合招聘考試），仲要通過三輪面試，包括即席講話、小組討論、個人面試，至有機會晌排山倒海嘅應徵者中被挑選。難怪連狀元都冇表示想做AO。
3. 扎鐵工：$47400
從前讀唔成書就去做地盤，但點解而家好多大學生都走去做地盤？因為人工分分鐘追到AO！按香港建造業總工會於10月17日發佈嘅2017年度薪酬調整，16個建造業工種平均加薪7.9%，亦係連續第九年加薪。其中愈來愈受大學生歡迎嘅扎鐵，日薪亦升至$2,370，如果一個月開足二十日工，即為月薪$47,400。
其實仲有兩個建造業工種仲勁過扎鐵人工，模板工人同混凝土工人嘅日薪分別為$2,500 同$2,600，如果一個月開足二十日工，月薪分別為$50,000同$52,000，已經高過AO起薪點！所以就算爭唔到AO，做地盤都會有錢途。
4. 督察：$39,660 – $42,110
按警務處數據，如新晉督察為中學畢業，起薪點為$39,660；如大學畢業為$40,880；如加上CRE中英文及格為$42,110。
投考督察須通過4項體能測試，包括800米跑、4 x 10米穿梭跑、立定跳高和手握肌力測試。雖然要考體能，但2016年已刪減較為嚴格嘅引體上升、仰臥起坐及俯臥挺伸3項體能測試。
5. 事務律師：$20,000 – $50,000
律師薪金不一，要視乎律師行規模而定，跨國大行同本地中小型行兩者嘅起薪點有頗大差異，亦有本地律師行按律師案件多寡而計算佣金。
有晌大律師行工作嘅律師表示，大律師行的見習律師薪金約有4、5萬元，在大行工作至30歲，月薪一般為7萬元或以上。但有畢業生於細行工作，其起薪點僅約2萬元。
6. 護士：$28,040／$30,945
如前述，醫護人手短缺，護士亦成為理想筍工！而精神科護士的起薪點，亦比一般護士高兩點，香港人患精神病問題愈來愈普遍，需求自然有多無少。
按政府數據，註冊護士（精神科）的起薪點為$30,945，頂薪為$47,240。而一般護士的起薪點為$28,040，頂薪為$45,120。
7. 行政主任（EO）：$28,040
AO之外，薪酬較低的EO也同樣爭崩頭。EO的起薪點為$28,040（第15點），頂薪為$49,445（第27點）。
去年有2.9萬人申請EO，EO位有120人，即平均241人爭一個位，競爭亦相當激烈。
8. 教師：$26,700／$28,040
教師職系分別GM（學位教師）和CM（文憑教師）。理論上，CM是為沒有大學學位的教師而設，但在學位通脹的今天，基本需要有學位才能成為CM，分別只是起薪點和頂薪不同。而學校亦可將CM教師轉為GM教師。
按教協數據，CM的起薪點為$26,700（第14點），頂薪為$43,145（第24點）；而GM的起薪點為$28,040，頂薪為$65,150。
9. 測量師：約$20,000
近幾年工程數量多，不只帶挈藍領工人，亦惠及測量師。
香港測量師學會指業界面臨人手荒，畢業生毋須擔心就業，起薪可達2萬元，考取專業資格及有一定經驗後，30歲月入可達5萬元。學會亦強調文、理科學生亦可報讀學位、投身業界。
10. 見習行政人員（MT）：平均$20,000
MT一向受畢業生歡迎，有機會晉身企業管理人員，起薪點及晉升階梯亦比企業其他職位高。
不同企業有不同的MT起薪點，港鐵、九巴、馬會、海洋公園、金管局等機構也設有MT。
以九巴的管理培訓生（Management Trainee，MT）為例，九巴今年招聘的MT起薪點為1.9萬至2萬元，將於11月截止申請，預計於明年3月發出聘書。
撰文：Arthur Chin