講起科技公司，美國的蘋果公司，聲勢已大不如前，iPhone的銷量更不似預期，未見驚喜。不過，蘋果產品仍有一班死忠粉絲捧場，而在現實生活中，原來亦有重大貢獻。
話說澳洲之前發生一單兇殺案，原本受害人的養女報稱，死者在搶劫時被殺，但警方就從死者的Apple Watch上的心率記錄、活動資料記錄中查到，與其養女的口供有所出入。養女話養母死之前被人綑綁，但Apple Watch顯示，死者臨死前可以發短訊畀老公，又曾經登入過eBay，證明死前可以自由活動，而養女提供假資料，令警方懷疑她正是謀殺案的兇手。
究竟事件的真相如何，就要等到六月法庭再審時才得知，不過，聽完單案之後，筆者都想買一隻Apple Watch，大吉利是有意外時，都有個記錄。不知此今次這單奇案又會否刺激到Apple Watch的銷量。
近日就有分析員預期，蘋果會於今年第三季推第四代Apple Watch，外觀設計會首度有改變，估計螢幕尺寸會變大百分之十五，電池續航力又會延長，亦會有更強的健康監控功能，相信果迷聽到一定非常高興。